Face

co'u se tarbi

do'e le mikce le mamta ba zi co'u se tarbi

mi na djica lo nu casnu gi'a pensi vau la'e di'e .i pe'u ro do do
xenru cusku va'o lo nu mi xamgu pendo do .i mi troci lo nu na pensi

mu'o mi'e .camgusmis.
  • Current Mood
    .ui nai cai
  • Tags
Face

vitke la'o zoi. BayCon .zoi

mi vitke la'e la'o zoi. http://baycon.org/2007/index.php .zoi noi mi
nelci .i mi zgana so'i verba .e so'i cifnu .i mi joi le selprami cu
casnu lo nu rirni lo mencre ja jikca bo cizra verba .i lo verba mu'a
cu mutce nelci lo nu tcidu lo saske cfika cukta .i mi milxe terpa da
poi fadni ke menli nabmi gi'e srana lo simsa verba .i sa'e mu'a lo
nu te cuska lo te kusru kei .a lo nu dukse lo nu xamgu ke sevzi
skicu cu fadni .i ku'i lo remna cu pluja .i lo nu rivbi da poi menli
se rinka cu nandu .i mi pensi .i .ia mi sanji lo xamgu tadji .i ku'i
no roi birti

mu'o mi'e .camgusmis.
  • Current Mood
    .ui .a'i ro'e
  • Tags
Face

la bakfu je cilta noi te bilma

mi te cmene la'e la'o zoi
http://en.wikipedia.org/wiki/Cystic_fibrosis zoi la bakfu je cilta
.i le jei lo remna cu bilma fi la bakfu je cilta cu mapti le du'u ro
rirni cu se jgina fi lo srana spofu .i .ii ru'e le mamta cu srana se
jgina spofu .i ku'i mi na sanji tu'a mi .i .a'o le mikce cu ba zi
facki fi mi

ni'o ta'o le tarbi cu la'a mapti la'o zoi
http://www.visembryo.com/baby/16.html zoi

mu'o mi'e .camgusmis.
  • Current Mood
    .ii ru'e
  • Tags
Face

.u'u ro'a

mi srera .i mi pu ze'a sanji le du'u le selprami cu mutce djica lo
nu kurji le cifnu .i ji'a le selprami joi le mamtu cu tordu casnu .i
ku'i no da jungau le drata patfu .i le drata patfu .i'a sai na gleki
.i .a'o sai le drata patfu cu fraxu

ni'o mi tcetce djica lo nu zenba lo ka morji certu .i ku'i na ka'e
xamgu stika le besna .i pe'a doi .singularit. ko sutra

mu'o mi'e .camgusmis.
  • Current Mood
    zungi to .oi ji'a no cmavo toi
  • Tags
Face

mamta mamta le tarbi

pu ze'a lo djedi be li ji'i mu mi joi le mamta joi le drata patfu cu
vitke le mamta be le mamta be'o goi ko'a .i my goi le mamta cu dunda
ko'a le karda poi skicu le tcidu fo lo ka rirni mamta .i ku'i le
mensi be my pu zu rirni .i se ki'u bo ko'a na jimpe .i ba za bo mi
joi my joi le drata patfu joi le mensi cu casnu le du'u ko'a na
jimpe to le mensi ji'a te dunda le karda .i ku'i le mensi zi co'i
jimpe toi

ni'o ba zi bo le drata patfu cu cusku lu doi ko'a le karda cu te
tcidu ma li'u .i ko'a cu cusku lu gleki ke mamta ke salci djedi doi
rirni mamta li'u .i ba ze'a bo le flira be ko'a cu tcetce masno
jarco fi lo ka jimpe .i da'i lo nu sutra jimpe cu zdile .i ku'i le
nu masno jimpe ca'a mutce zdile

mu'o mi'e .camgusmis.
  • Current Mood
    .u'i sai
  • Tags
Face

pendo tcica cusku

mi pu pensi tu'a lo nu verba cusku bo gunta .i mi so'i sai roi lirfi
gi'e mutce badri binxo .i mi tcetce djica lo nu le panzi ka'e jimpe
lo fadni je ka pendo kei nu tcica cusku poi frica lo nu cusku gunta
kei mu'i lo nu mi na kakne ca le nu verba .i lo nu gleki cu mutce
nandu va'o la'e di'u .i mi ni'i lo nu na jimpe le frica ca lo nu
verba cu na sanji su'o tadji be lo nu ctuca le panzi .i ta'o ta'i ma
da ctuca de poi da na jimpe ke'a

ni'o ku'i ca le cabna cerni mi binxo sanji .ua sai le du'u le mi re
mei rirni ji'i no roi pendo tcica bo cusku .i ju'a sai so'a fadni
ke makcu remna cu pendo tcica bo cusku cei broda .i mi .e ro pendo
di'i broda .i .ua sai na spaji fa lo nu mi no roi broda jimpe ca lo
nu verba .i ku'i .ua .ui sai mi joi le drata rirni cu di'i roi broda
.i se ni'i bo .a'o sai le panzi cu jimpe pu tu'a lo ckule

.ii nai ru'e

mu'o mi'e .camgusmis.
  • Current Music
    la'o zoi BREAK DOWN! zoi po la'o zoi DDR zoi
  • Tags
Face

pixra lo'e tarbi

le selprami .e mi ze'a pu je ze'a ba zgana la'o zoi.
http://www.visembryo.com/baby/index.html .zoi mu'i lo nu jimpe djica
.i mi'a tcetce se cinri lo tarbi ve pruce .i le tarbi ca ca'a se
pruce fo li pa ze ca'i ra

ni'o ji'a mi'a vitke le cukta zarci .i sy pu na'e mutce sanji le jei
no da sinma lo patfu .i ku'i so'u cifnu cukta poi steci srana lo
patfu cu zasti .i bo ji'a pi so'a ra se ralju lo nu sidju lo mamta
gi'e nai srana le se cinmo be lo patfu .i spaji sy .e nai mi .i ji'a
sy zgana no cukta poi steci srana lo nanmu nu kanro

mu'o mi'e .camgusmis.
  • Current Mood
    .a'u
  • Tags
Face

risna rilti

ca le cabdei le mamta joi mi vitke le mikce .i mi pu tcetce terpa lo
nu le xadni be le mamta ba zi co'u se pagbu le tarbi .i le ni mi
terpa cu banzu le nu fanta lo nu mi sipna .i ta'o ru'e lo ninmu poi
simsa le mamta lo ka nanca zo'u lo nu co'u se pagbu cu pi ze mu cu'o
.i ku'i go'o

ni'o gau le mikce mi'a zgana le vidni be le tarbi bei ta'i tu'a lo
sance boxna be fu lo tcetce sutra .i le mikce cu facki gi'e jarco
vau le tcetce cmalu ke blabi se tarmi po'u le tarbi .i ji'a le mikce
cu jarco fi lo ka le se tarmi cu ritli stika lo ka gusni .i my xusra
le du'u la'e di'u cu risna ritli .i se mu'i bo mi curve le ka gleki
.i ji'a sai .ui cai my xusra le du'u di'e .i lo nu co'u se pagbu cu
pi pa mu cu'o lo nu le risna cu xamgu damri to le tarbi risna cu
go'i toi

ni'o .ui cai .a'e nai sai .u'e cai .a'o cai .ii nai ru'e

mu'o mi'e .camgusmis.
  • Current Mood
    .u'e cai
  • Tags
Face

bi'u tarbi

mi pu za sanji lo nu mi te tarbi .i mi ba ciska lo so'i mei ke tarbi
srana ve cu'u dei .i se ki'u bo mi skicu lo vajni .i li'a sai le
tarbi cu vajni .i mi .ai sai cusku zo'e poi jbobau ku'o po'o ru'e le
tarbi .i se ri'a bo le tarbi ba .a'o sai pa moi lojbo verba .i lu le
verba li'u .e lu le tarbi li'u .e lu le se rirni li'u .e lu le cifnu
li'u cu tcita le tarbi

ni'o so'u drata remna cu vajni .i mi patfu to coi ro do toi .i ku'i
mi te cmene lo drata lo tcita .i le mamta cu mamta le tarbi to li'a
sai toi .i le drata se prami be mi be'o no'u le selprami cu na du le
mamta .i le selprami cu tcetce djica lo nu kurji le verba .i bi'u mi
joi le mamta joi le pendo be mi be'o no'u le se prami be le mamta cu
xabju da .i lu le drata patfu li'u cu tcita ri

mu'o mi'e .camgusmis.
  • Current Mood
    xanka to ma cmavo .oi toi
  • Tags